Extrait du premier livre de François Rabelais, Gargantua, chapitre XLIX :

Comment Picrochole fuiant feut surprins de males fortunes, et ce que feit Gargantua après la bataille.

[...] Picrochole ainsi desesperé s'en fuyt vers l'Isle Bouchart et, au chemin de Riviere, son cheval bruncha par terre, à quoy tant feust indigné que de son espée, le tua en sa chole. Puis, ne trouvant personne qui le remontast, voulut prendre un asne du moulin qui là aupres estoit ; mais les meusniers le meurtrirent tout de coups et le destrousserent de ses habillemens, et luy baillerent pour soy couvrir une meschante sequenye.

Ainsi s'en alla le pauvre cholericque; puis passant l'eau au Port Huaulx et racontant ses males fortunes, feut advisé par une vieille Lourpidon, que son royaulme luy seroit rendu à la venue des Cocquecigrues : depuis ne sçait on qu'il est devenu. Toutesfoys, l'on m'ha dict qu'il est de present pauvre gaignedenier à Lyon, cholere comme davant. Et tousjours se guemente à tous estrangiers de la vonue des Cocquecigrues, esperant certainement, scelon la prophetie de la vieille, estre à leur venue reintegré à son royaulme. Après leur retraicte, Gargantua premierement recensa les gens et trouva que peu d'iceulx estoient peryz en la bataille, scavoir est quelques gens de pied de la bande du Capitaine Tolmere, et Ponocrates qui avoit un coup de harquebouze en son pourpoinct. Puis les feist refraischer chascun par sa bande et commanda ès thesauriers que ce repas leur feust defrayé et payé, et que l'on ne feist oultrage quelconques en la ville, veu qu'elle estoit sienne, et après leur repas ilz comparussent en la place davant le chasteau, et là seroient payez pour six mois. Ce que feut faict, puis feist convenir davant soy en ladicte place tous ceulx qui là restoient de la part de Picrochole, esquelz, presens tous ses Princes et capitaines, parla comme s'ensuyt. [...]

Les habillemens:

(page en construction)